काठमाडौँ । नेपालको छाला तथा जुत्ता उद्योगमा काम गर्ने भारतीय कामदारले बर्षेनी १५ अर्बको हाराहारीमा रेमिटेन्स रकम भारत लाने गरेका छन् । नेपालमा सञ्चालनमा रहेका करिब १५ सयको हाराहारीका ठूला, मझौला तथा साना छाला, जुत्ता तथा चप्पल उद्योगहरूमा काम गर्ने भारतीय कामदारले बर्षेनी सो रकम भारत लैजाने गरेको फुटवेयर म्यानुयाक्चर एसोसिएसनले जनाएको छ ।
यस उद्योगमा काम गर्ने भारतीय कामदारहरूले मासिक न्यूनतम ४० हजार देखि सवा लाखसम्म कमाउने गरेका छन् । नेपालका छाला जुत्ताजन्य उद्योगमा मात्र ६० देखि ७० प्रतिशतको हाराहारीमा भारतीय कामदारहरूले काम गर्ने गरेका छन् । यस उद्योगमा नेपाली कामदारहरू ३० प्रतिशत मात्र रहेका छन् ।
यस उद्योगमा नेपाली कामदारको सङ्ख्या निकै कम छ । ३० देखि ४० हजार मासिक कमाइका लागि नेपाली युवाहरू रोजगारीका लागि खाडी मुलुक जाने गरेको नेपाल फुटवेयर म्यानुयाक्चर एसोसिएसनका अध्यक्ष नानीराज घिमिरेले बताउनुभयो ।
सरकारले यस क्षेत्रमा नेपाली युवाहरूलाई रोजगार बनाउने कार्यक्रम ल्याएमा आफूहरू सहयोग गर्न तयार रहेको अध्यक्ष घिमिरेले बताउनुभयो ।
यो खबर पढेर तपाईलाई कस्तो महसुस भयो ?
