काठमााडै । ग्रिन टायर प्रालिले ट्रयाक्टरको पछाडी भागमा लाग्ने टायर उत्पादन गरेर बजारमा ल्याएको छ । शेर्पा ब्रान्डमा उत्पादन गरिएको उक्त टायरको नाम सारथी राखिएको छ । रियर टायर भनिने ट्रयाक्टरको पछिल्लो भागमा प्रयोग गर्न सकिने उक्त टायर कृषि क्षेत्रमा प्रयोग हुने पहिलो नेपाली टायर भएको कम्पनीले दावी गरेको छ । नेपालको कठिन सडक तथा भौगोलिक संरचनाको हिसाबले तयार गरिएकोले सो टायर नेपाली माटो तथा बाटोलाई सुहाउने पनि कम्पनीले जनाएको छ ।
सो टायरमा ताप प्रतिरोधी क्षमता रहेको छ भने पन्चर सुरक्षाको लागि थ्रेडको बीचमा अतिरिक्त रबर प्रयोग गरिएको छ । कुल २० वटा गोटी रहेको र हाई एनएसडी सहित उत्कृष्ट ट्रयाक्सनयुक्त टायर भएकोले यसले राम्रो उत्पादकत्व दिनेमा कम्पनी विश्वस्त रहेको छ । हाल यो टायर १३.६–२८ को साइजमा बजारमा उपलब्ध छ । आगामी केही दिनमा अन्य साइजका एग्रिकल्चर टायर समेत बजारमा उपलब्ध गराउने तयारी भइरहेको कम्पनीले बताएको छ ।
तीन वर्ष पहिले मोरङको कटहरीमा स्थापना भएको ग्रिन टायर प्रालिले डेल्टा र शेर्पा ब्रान्डका टु ह्विलर, थ्री ह्विलर तथा एग्रिकल्चर सेगमेन्टका टायर उत्पादन गर्छ । हाल कम्पनीले प्रतिवर्ष २ दशमलब ५ लाख थान टायर उत्पादन गरिरहेको छ । आगामी वर्षदेखि ५ लाख थान टायर उत्पादन हुने कम्पनीले जनाएको छ । हाल ग्रिन टायरमा कुल १५० जना कामदार कार्यरत छन ।
यो खबर पढेर तपाईलाई कस्तो महसुस भयो ?
